Түркістан облысында халық көп шоғырланған ірі базарларда кітапхана ашу жобасы жүзеге асырылды. Осы жоба аясында 11 қаңтарда Түркістан қаласындағы «Қуаныш» сауда орталығында «Фараб» кітапхана пункті ашылды. – «Базардағы кітапхана» идеясы адамдар көп шоғырланған жерлерде білім беру және мәдени алаң құру мақсатымен туындады және бүгінде ол жүзеге асырылуда. Бұл жобаны облыс әкімі Дархан Сатыбалды қолдап, қоғам мәдениетін дамыту бағытында жүйелі шаралар ұйымдастыруды тапсырып отыр. Өздеріңізге белгілі, өңірде тұрғындардың басым көпшілігі сауда нүктелері арқылы кәсібін дөңгелетіп жүр. Қарапайым халықтың да жиі келетін орны – базар. Сондықтан да осындағы кәсіпкерлердің кітап оқып, іскерлік тұрғыдан ізденуіне қолдау білдіріп, мәдени ортаны кеңейту мақсатында тың жобаны бастадық. Қаладағы ең үлкен «Қуаныш» сауда орталығында 1700-ден астам кәсіпкер жұмыс істейді. Күніне орта есеппен 20 мыңнан астам адам келеді. Бүгінгі ашылып жатқан кітапхана бір күнде 70 адамға дейін қызмет көрсетеді, айына орта есеппен 1500 адам қамтиды деп жоспарлануда. Мұндай тың жобаны әрі қарай да аудан, қалалардағы орталық базарларда жалғастыратын боламыз. Қоғамды кітап оқуға қызықтыратын жаңа жобалардың жандануы оқырманның көбеюіне тікелей әсер етеді. Бастамамызға қолдау білдірген базар иелеріне алғысымды білдіргім келеді. Бүгінгі кітапхана пункті де оқырман игілігі үшін қызмет етеді деп сенемін, – деді облыс әкімінің орынбасары Бейсен Дәулетұлы. Мұнда түрлі бағыттағы көркем әдебиеттер мен кәсіпті нығайтуға бағытталған және жігер беретін әлемдік бестселлерден құралған 3 мыңға жуық кітап қоры бар. Бұл туындылар кәсіпкерлерге өз бизнесін дамытуға, тұлға ретінде қалыптасуына үлес қосып қана қоймай, жаңа әрі креативті идеялардың тууына мүмкіндік бермек. Халықтың сұранысына сай кітап сөрелері тұрақты түрде жаңартылып отырады. Сонымен қатар арнайы қатарлар немесе шкафтар орнатылып, сол жерде азаматтар оқыған кітаптарын сыйға қалдырады немесе басқа кітаптармен алмастырып оқи алады. Облыс әкімдігінің тапсырмасына сәйкес ашылып отырған кітапхана қызметі білімге қолжетімділікті, мәдени құндылықтармен алмасуды көздейді. Сонымен бірге азаматтарға мерзімді басылымдар мен көркем әдебиеттерді, балаларға арналған кітаптарды ұсынады. Оқуға жайлы орта жасап, оқырманмен тығыз байланыс орнатып, келушілердің уақытын тиімді өткізуіне ықпал етеді.